Klein Karoo Plaaswerker van die Jaar | Western Cape Government

Speech

Klein Karoo Plaaswerker van die Jaar

20 September 2012

Landbouvriende, dankie vir die geleentheid om vanaand saam met u te kan kuier. Dankie dat u deelneem aan die Wes-Kaap Plaaswerker van die Jaar Kompetisie. Dankie aan die werkgewers dat u dit moontlik maak vir die werkers om in te skryf. Die Kompetisie groei elke jaar, en vanjaar neem 16 streke deel, en daar is meer as 1 000 inskrywings ontvang. Die algehele wenner se prys beloop meer as R100 000.

Plaaswerk is besig om radikaal te verander, en werkers wat nie ernstig is daarmee om hul vaardighede op te skerp en hulself toe te rus vir die nuwe eise wat die werk stel nie, gaan agter raak. Plaaswerk is nie meer iets wat elke jaar dieselfde bly nie. En dit is elke werker se eie verantwoordelikheid om te sorg dat hy op die voorpunt bly van sy spesifieke terrein.
 
Die Plaaswerker Kompetisie gee erkenning aan werkers wat leiers op hul terrein is. Dit is beslis iets om op jou CV te skryf. Die blote feit dat jy deelneem spreek boekdele van jou karakter. Werkgewers soek vandag werkers wat ook voorentoe wil gaan in die lewe.
 
In u omgewing gaan dit op die oomblik baie swaar. Ek is geweldig bekommerd oor die situasie in die volstruisbedryf. Julle bedryf. Ek weet dat omtrent almal wat vannaand hier is kom van plase waar volstruise die kern van die besigheid is. En julle kan al amper 20 maande nie vleis uitvoer nie.
 
Ek weet julle is bekommerd oor julle werk en of julle in die toekoms nog vir julle families gaan kan sorg. Ek is ook bekommerd daaroor, en het die afgelope 20 maande baie hard gewerk om op `n regeringsvlak oplossings vir die krisis te soek:
  • Reg aan die begin van die Voëlgriep uitbraak het ek versoek dat die industrie tot `n ramp verklaar moet word. Dit het egter nie geslaag nie, aangesien die definisie van `n ramp in ons wetgewing dit nie toelaat nie.
  • Daarna het my departement se veeartse en dieretegnici baie hard gewerk om monsters te trek; ontledings te doen, en diere te laat uitslag op positiewe plase. Die maatreëls wat ons getref het is volgens Suid Afrikaanse wetgewing, maar ook in ooreenstemming met die vereistes van ons uitvoermarkte.
  • Ons het gevolglik 50 000 volstruie in die Klein Karoo en die Suid Kaap van kant gemaak.
  • Daar is al meer as R50 miljoen se kompensasie aan boere uitbetaal en die operasie kos die Nasionale Regering al meer as R60 miljoen.
  • Ons het gehoop dat hierdie maatreëls die virus sal uitwis, maar dit lyk op hierdie stadium nie asof dit die geval is nie.
Ek het as gevolg hiervan `n vergadering aangevra tussen die Nasionale Departement van Landbou; my amptenare en die volstruisbedryf. Ons het vir die Nasionale Departement gevrae om te help met alternatiewe metodes as uitslag. Ek is bekommerd dat uitslag al die volstruise doodmaak, maar nie die virus uitwis nie. Die virus vlieg steeds bo ons koppe saam met die wilde voëls.
 
Ek wag steeds op terugvoer vanaf die Nasionale Departement in hierdie verband, maar ons volg dit gereeld op.
 
Ek het vanmiddag `n waterberaad op Oudtshoorn belê. Waterskaarste in julle gebied maak dit baie moeilik om alternatiewe vir volstruisboerdery te vind.
 
Ek weet dat bogenoemde nog nie `n positiewe resultaat opgelewer het nie. Ek voel soms dat ons geluk aan ons kant nodig het om hierdie uitdaging te oorkom. Maar: As jy geluk wil hê in die lewe, moet jy werk maak daarvan en iets doen. Brain Tracy het gesê: “I have found that luck is quite predictable. If you want more luck, take more chances. Be more active”. Vriende, ek sal aanhou probeer om bietjie geluk vir die volstruisbedryf te skep.
 
Terug by die kompetisie en die rede waarom ons vannaand hier is. In moeilike tye soos hierdie, is dit van soveel meer belang dat werkers moet sorg dat hulle onmisbaar is op die plaas. Wanneer jy onmisbaar is, voeg jy waarde toe. Jy is dan daardie man of vrou wat elke dag iets ekstra doen.
 
Ek weet dat julle daardie mans en vroue is. Ek is ongelooflik trots op die plaaswerkers van die Wes-Kaap, en sover dit my aangaan is elkeen van julle reeds wenners. Kom ons werk saam om die moeilike tye te bowe te kom. Serkte en voorspoed vir die toekoms.
Media Enquiries: 

Wouter Kriel
Tel: 021 483 4700
Cell: 079 694 3085
E-mail: wouter.kriel@westerncape.gov.za