Super Hero Smiles gee rede om te glimlag

’n Tandheelkunde program gemik op kleuters, Super Hero Smiles, wat twee jaar gelede geloods is in die Beaufort-Wes sub-distrik, werp vrugte af. Die program is deur Dr Ronel Potgieter begin om voorkomend op te tree wat mondhigiëne onder kinders betref.  Daar is tans 920 kinders betrokke by die program.
“Ons kleuterskoolprogram doen ongelooflik goed. Ons het met dit begin omdat ons te veel tandjies moes trek, wat voorkom kon word deur basiese mondhigiëne en inligting vir die gemeenskappe,” verduidelik tandarts Ronel Potgieter.
Die program word bestuur deur Potgieter, Roselle Hawker, Nelli Abrahams en 28 gemeenskapsorgwerkers. Super Hero Smiles het afgeskop met slegs een kleuterskool vroeg in 2017, maar teen die einde van die jaar was daar reeds twee kleuterskole betrokke waar gemeenksapsorgwerkers daagliks die kinders se tandjies gaan borsel het. 'n Derde kleuterskool is bygevoeg en hier het die onderwysers sommer self ingespring om te help borsel. 
Daar is drie nuwe kleuterskole in 2018 by die projek gevoeg. Die projek het nou vier kleuterskole wat elke dag deur gemeenskapsorgwerkers besoek word en twee wat deur onderwysers bestuur word.
Die kleuterskole wat tans deelneem, is Belindia, St John's, Embulumko, Khanyisa, Vuurvliegies, en Kleuterland.  
Elke kleuterskool ontvang tandeborsels en tandepasta vir elke kind, wat moontlik gemaak word deur borge.
“Ons is ongelooflik dankbaar vir die gemeenskapsorgwerkers en die onderwysers se hulp en entoesiasme oor die projek. As almal nie saamwerk as 'n span nie, sal dit 'n onmoontlike taak wees om soveel kinders te bereik.  Behalwe dat ons nou elke dag beter mondhigiëne bevorder, het die program ook positiewe effekte wat ons nie eers kon voorspel het nie. Ouers van kinders betrokke by die program besoek nou gereeld die kliniek om tandeborsels en tandepasta te kom haal sodat hulle ook by die huis kan borsel. So ook het 30% meer van die betrokke kinders die kliniek besoek vir ondersoeke en behandeling. Dit is dus baie duidelik dat die betrokkenheid van die tandheelkunde span die ouers en kinders groter vrymoedigheid gee om die kliniek te besoek en dat hulle ook baie meer ingestel is op goeie mondgesondheid.  Ons groot droom is om al die kleuterskole in Beaufort-Wes betrokke te kry by 'n gemoniteerde tandeborselprogram. Ek glo vas deur so jonk te begin met bewusmaking, ons oor die lang termyn 'n groot verskil kan maak aan hoe mense na hul eie mondgesondheid en ook dié van hul kinders kyk,” sê Potgieter.