Volgens Dr James Kitching, hoof van die laboratorium, het nuwe tegnologie tot gevolg dat nuwe tegnieke gesien word as die norm vir sekere diagnostiese toetse. "PKR (polimerase kettingreaksie) toetse word gebruik vir die identifikasie van veral virusse," verduidelik hy. "Die tegniek is nie goedkoper ten opsigte van reagense en toetse nie, maar is vinnig, meer sensitief en meer spesifiek."
Hierdie nuwe seksie van die laboratorium sal ook die aangrensende provinsies bedien. Omdat die laboratoriums wat die tegniek uitvoer beperk is word daar tans dikwels vertragings ondervind met die verkryging van resultate. Weens die delikate aard van die prosedures is dit nodig om baie spesifieke beheer te verkry oor die toegang tot die verskillende vertrekke en hiervoor is daar 'n rekenaar beheerde stelsel in plek geplaas. Daar sal begin word met toetse vir die voëlgriep virus en daarna vir Newcastle siekte en Afrika Perdesiekte virusse. Hierdie seksie is reeds volledig toegerus met apparaat.
Weens die vereistes van die Europese Gemeenskap (EG) vir vleis en ook om die veiligheid van dierlike produkte vir interne gebruik te verseker, is dit nodig om vir residue van middels en toksiese stowwe te toets. Tans word hierdie toetse by een of twee laboratoriums gedoen en duur dit tot 12 maande voordat resultate beskikbaar word. 'n Voorlegging is reeds na die EG verteenwoordiger om fondse te beding vir die aankoop van toerusting. Die laboratoriumspasies is nou geskep om sulke toerusting te huisves.
"Vir beide PKR-werk en residubepalings word water suiwering benodig. Ook hiervoor is spasie beskikbaar en is die toerusting reeds in plek," sê Kitching. "In dieselfde vertrek word toerusting vir die vriesdroog van serum en isolate gehuisves."
Monsters waarop toetse uitgevoer word moet behou word vir 'n periode sodat dit weer benut kan word indien hertoetsing of alternatiewe toetse benodig word. Die lengte van die periode hang af van die tipe monster en die toetse wat daarop uitgevoer word. Die berging van sulke monsters vind oral in die laboratorium plaas en yskaste en vrieskaste neem spasie in wat vir ander doeleindes aangewend kan word. Derhalwe is daar 'n inloopyskas en inloopvrieskas in die uitbreiding ingebou vir die kort- en mediumtermyn berging van monsters. Hierdie kan ook beskou word as mediumtermyn argiewe vir monsters.
Soos die geval met die berging van monsters het die berging van dokumentasie 'n groot probleem geword. Met die omvang van die nood om dokumente te berg het dit nodig geword om 'n spesifieke argief aan te bou.
Die laboratorium het reeds goeie vordering gemaak met die dokumentasie wat nodig sal wees vir akkreditasie van verskeie toetse. Dit is egter nodig dat die beheer hiervan gesentraliseer word met beamptes wat spesifiek hierdie saak as hul verantwoordelikheid het. Hiervoor is daar 'n "kwaliteitskantoor" beskikbaar gemaak.
Op die foto: Dr James Kitching (middel) wys die nuwe fasiliteite aan Cobus Dowry en Joyene Isaacs, hoof van departement landbou.
Navrae:
Charlene Nieuwoudt
Kommunikasiebestuurder
Wes-Kaapse Departement Landbou
Tel: 021 808 5008
Fax: 021 808 5000
